لقاء الدموع

وين گبرك يا حبيبي يا حُسين

وين گبرك يا حبيبي يا حُسين

وين گبرك آنه زينب بت علي

جيت خويه وصوت نوحي يعتلي

جيتك وجبت الحرم يبن الولي

نريد يم گبرك نذب تعب السنين

وين گبرك يا حبيبي يا حُسين

وين گبرك آنه ليلى يا غريب
نيتي أرويه بدمع عيني نحيب
وين گبرك يمَن لجروحي طبيب

جيت ادور اعليه يحديني الونين

وين گبرك يا حبيبي يا حُسين

وين گبرك آنه رمله الفاجده
ابني جاسم راح لعيونك فِده
واجده يحسين جيتك والنِده

ريت نحري الچان مگطوع الوتين

وين گبرك يا حبيبي يا حُسين

وين گبرك انه يحسين الرباب

جيتك ويا محله وياك العتاب

بينك وبيني فصل سيف المصاب

واخذ سهم البين من حضني الجنين

وين گبرك يا حبيبي يا حُسين

وين گبرك يبني انه فاطمه
جيت ويه الحرم من عين السمه
جيت امسح بيدي اثار الدمه

جيت ادَوِّر وين مگطوع الادين

وين گبرك يا حبيبي يا حُسين

جيت ادور وين چفين الوفه
وياي اريد آخذهن بهاي الصفه
حتى يوم الحشر لجروحي شفه

الله ياخذ ثاري من الظالمين

وين گبرك يا حبيبي ياحُسين

فاطمه وي زينب اتصب الدمع
ثنينهن گعدن بجنب المنصرع
زينب اتنادي وفاطم تستمع

يا غريب ويا سليب ويا طعين

وين كبرك يا حبيبي ياحُسين