الأمان الأمان

الك يا حجة الباري بالدمع أشرح وضعنه
وانت يبن الحسن تدري بكل بواطن مجتمعنه
نعتب ومن كثر هذا العتب ملينه وجزعـنه
اشما نعاتب بالنوايب
من يتجاوب وانت غايب
نعتب ومحد سمعنه

مجتمع بالوهم سارح خسر أهدافه ورصيده
زين لو بالألف واحد يملك ايمان وعقيده
تريد منهم الك ناصر وين ذاك اللي تريده
والتندبه تاه دربه
ومن تجربه تشوف گلبه
ثعلب ونهجه المكيده

الدين أصبح يستجير وما حصل واحد يجيره
صدگ لو گالوا يغايب كلمن وذاتـه وضميره
ذاك من ذاك التشوفه مخلص وصافي السريـره
يا فخرنه يا ضخرنه
ابخطر صرنه ومن صبرنه
الگلب ما يخمد سعيره

سيدي والناس أضحت واهمه وتاخذ المظـهر
واللي تعتبره جواهر من تجربه فحم يظـهر
باطنه الحجاج لاچن ضاهره مالك الأشتـر
ومن توصفه يزهي وصفه
ومن تكشفه يالتعرفه
اتشوفه من مروان أمكر

سيدي والمثل واضح ما أظن عالناس يخفه
كل شخص لو مرض صابه من الطبيب اينول وصفه
والطبيب اشلون لمن يمرض بيا دوه يشـفه
ياضمدنه ياعمدنه
الدنيه ضدنه ومنهو عدنه
نصرخ ونعتب ابلهفه

سيدي ويا يوم چفك يشهر اعله الظلم سيفه
ويطفي جمر اللي توجر من لهب نار السقيفه
وتدري يا باب الدفعها بالظلم چف الخليفه
هذا جرمه وعرش حكمه
انبنه ابظلمه وعلى الامه
واضح وما يخفي زيفه

هجموا اعله امك الزهره ريتك اتشاهد وضعهـا
شتنسه يبن الحسن منهم تنسه محسن لو ضلعها
ولمن اعله الدار هجموا صاحت الزهره بدمعها
صوتي ينعي يجري دمعي
هذا وضعي انكسر ضلعي
صاحت ومحد سمعها