طال إنتظارك لا تنسه ثارك

طال إنتظارك

لا تنسه ثارك

يبن الحسن

يمته ونشاهد طلعتك جار الزمان إعلينه
يا ما نطينا أرواح إلك وبكل فخر ضحينه
چم مره نعتب سيدي ومن العتب ملينه
نادتنه أصحاب الدجل غايبكم إنتم وينه

دربك گضيه

أشرف هويه

وجنة عدن

أول شعار إنوضحه ونرسم نريد أهدافه
وكل شيعي يبن المصطفه يبقه إسمك إعله إشفافه
هيهات درب التضحيه لحظه المحب ما عافه
وهذا النهج يبن الحسن جن العقل بأوصافه

غالي لواكم

نتبع خطاكم

رغم الفتن

يمته الوعد يالمنتظر طول علينه إغيابك
ما عدنه غيرك يا شهم بالمدمع إندگ بابك
نادينه يبن العسكري ونسمع نريد إجوابك
خدامك إحنه وشيعتك وإنت الشرف محرابك

لو حاربونه

لو عذبونه

حبك وطن

ننتظرك وعدنه أمل تجبر إگلوب الشيعه
وأمرك يبن خير الوره الآخر عمرنه إنطيعه
كل عاشگ إبدم الشرف قدم إلك توقيعه
يالغايب وهذا العهد يخسه اليگول إنبيعه

للعزه صحنه

لجلك صبحنه

نلبس چفن

وينك يا أيوب الصبر فاض الصبر وإتبده
والثائر العنده هدف غيرك امل ما عنده
ودرب الكرامه والمجد دم الشهاده إيخلده
يا ساعه ترفع صرختك ما گرب يومك وعده

يمته ونشوفك

لتظن نعوفك

رغم الزمن

طال الغياب وشيعتك يبن الحسن منتظره
يا يوم يا ساعه وزمن تطلب إبثار الزهره
وكل فرد من شيعة علي لجلك يقدم نحره
ووادي الطفوف إيناشدك إعلن شعار الثوره

تحچي المشاعر

صوت المناحر

يمك علن