الشعر الشعبي: شمس وعدك
السيد سعد الذبحاوي
كلوب من كثر القهر مكروبة*** وشمس وعدك اصبحت محجوبة
نعتب وندري العتاب يألمك***لجن يا موعود جم ثار الإلك
ذبح سم تشريد خلصوا كل هلك***والتعازي بكل كتر منصوبة
============================================
بكل كتر منصوبة يا ثار الجليل***والدّموع الحالتك من دم تسيل
عمر كوض كلّه بنياح وعويل***والوكت ويانه شن احروبه
============================================
ويانه شن حروبه يبن العسكري***والصبر طَعمه صُبح مّر وشري
جم ثمود الرجع وشجم سامري***بيا طلب شيعة علي مطلوبة
============================================
شيعتك مصيوبة يا مهدي الزمان***طشّروها اوّوزعوها بكل مكان
مالها مأوى تدور ولا أمان *** ليش من دون الأمم منكوبه
============================================
والفرج جا يمته يا نور البصر***إلك جم جبد التكطع جم نحر
وجم ضلع منكم تهشم وانكسر***والحقوق مفرهدة و منهوبة
============================================
مفرهدة ومنهوبة يا راعي العدل***بالسموم العترة خلصت والجتل
تدري من الزهرة كتلوا جم طفل***وجم رضيع الركَبته مخضوبه
=============================================
جم رضيع الركبته حزها اللعين*** وين عن طف كربلا يالمهدي وين
كوم واصرخ يالثارات الحسين***وخلي أركاب الشِرِك مصلوبه
